Soruşula biləcək bütün suallara hazırlaşdınız, özünüzü ən özgüvənli hiss etdiyiniz geyiminizi geyindiniz və güzgü qarşısına keçdiniz. Əla görünürsünüz! Məkana təyin olunmuş vaxtda çatdınız. Müsahibəyə başlayarkən enerjili bir giriş, əmin şəkildə əl sıxmaq, inamlı göz təması. Əyləşdiniz. Bu iş tam sizlikdir!

“Bir dəqiqə! Bu necə müsahibə suallardır? Nyu-Yorkda neçə pəncərə olduğunu niyə bilməliyəm? Axı bu mənim nəyimə lazımdır?” suallarını səsləndirə bilərsiniz. 
İstədiyiniz qədər təəccüblənin, bu suallar hətta qlobal şirkətlərdə də verilir. 

Bəs niyə insan resursları mütəxəssisləri belə müsahibə sualları verirlər? Müsahibəyə gələn namizədlər daha çox öz ixtisasları ilə əlaqəli suallar veriləcəyini düşünür. Gözləmədiyi tərzdə suallar eşidən zaman hazırlıqsız yaxalanır və əsl şəxsiyyətini, xarakterini üzə çıxarırlar. Bu üsulla insan resursları mütəxəssisi sizin baxış mövqeyinizi, kriz dövrünə hazırlığınızı, riskləri idarəetmə qabiliyyətinizi analiz edərək sizi tanımağa çalışır. Burada əsas məsələ sualın cavabı deyil, o suala cavab vermə üsulunuz və tərziniz olur.

Uzun sözün qısası, siz maraq doğuran suallara “Bunun işə nə aidiyyatı var ki?” kimi kobud reaksiya verə bilərsiniz, yaxud da gözlənilməz sualın təsirindən “dilinizi pişik yeyə” bilər.

Sizə məşhur qlobal şirkətlərin müsahibə əsnasında namizədlərə verdiyi qəribə sualların bəzilərini toplamışıq: 

• "Amerikada neçə radionun olduğunu necə təxmin edərsiniz?" - PepsiCo// Pərakəndə satış
• "8 yaşlı uşağa dinamometri necə izah edərdiniz?" - Tesla Motor// Mühəndis
• "Bir Sony məhsulu olsaydınız, hansı olardınız?" - Sony// Pərakəndə Satış Mütəxəssisi
• "Lifti necə sınaqdan keçirərsiniz" - Microsoft // Biznes İnkişafı Mütəxəssisi
• "Bir qutu qələminiz olsaydı, onlarla 10 qeyri-adi nə düzəldərdiniz?" - Google // İnzibati köməkçi
• "Almanlar dünyanın ən hündür boylu insanları olsaydı, bunu necə sübut edərdiniz?" - HP// Məhsulun Marketinq Meneceri
• “Əlində bir dəstə gül var. İkisindən başqa hamısı qızılgül, ikisindən başqa hamısı çobanyastığı, ikisindən başqa hamısı səhləbdir. Bu dəstədə cəmi neçə çiçək var?”- Epic Systems// Korporativ Layihə
• "Cümə günü saat 14:30-da San-Fransiskoda neçə nəfər Facebook-dan istifadə edir?" - Google // Müştəri Əlaqələri Meneceri
• "Əgər siz Marslı olsaydınız, Yerin problemlərini necə həll edərdiniz?" - Amazon// İnsan Resursları üzrə Baş Mütəxəssis
• "Bir saatı ən yaradıcı şəkildə necə sındırarsınız?"- Apple// Təcrübə
• "Əgər siz bir yol nişanı olsaydınız, hansı olardınız?" - Pacific Sunwear// Satış Mütəxəssisi
• “Niyə sizi işə götürməyək?” - Twitter// İnsan Resursları Heyəti
• “Təsəvvür edin ki, heç kimin ağlına gəlmədiyi və ya əvvəllər etmədiyi bir məhsul və ya xidmət universitetinizdə inqilabi sıçrayış edəcək. Bunun marketinqini necə edərdiniz?” - JP Morgan Chase// Marketinq və Analitika üzrə Təcrübəçi